ඔබේ හුස්ම ගලන්නේ

මගේ හෘද කුහර තුලින් ය

ඔබේ සුවඳ රැඳෙන්නේ

මගේ මනස ගැඹුරේ ය.

ඔබේ දෑස් කාන්තියෙන්

මගේ දෑස් එලිය වන්නේ ය

ඔබේ සිනහවෙන්

මට ද සිනහව සිහිවන්නේ ය

ඔබේ වදනින්

මගේ සිත සැනසෙන්නේ ය

ඔබේ රුවෙන්

මගේ සිත කම්පිත වන්නේ ය

ඔබේ ආදරයෙන්

මගේ ලෝකය පිරෙන්නේ ය.

ඔබේ සතුට

මට ජීවය ගෙනෙන්නේ ය.

සියල්ලම වූ ඔබ

මගේ ජීවිතය වන්නේ ය.

මා යනුවෙන් ලොවෙහි

කොතැනක හෝ

ස්කන්ධයක් වේ ද,

ඒ ඔබ ය.

ඔබම පමණක් ය.

~S

2026/01/28

 පිටින් කෙතරම්

සුමුදු වූවද,

ඇතුල තනිකර

රළු ය ; පරළු ය...

ගලක් පෙන්වා

මලක් කීවද

එය එසේමය 

පිළිගනු පෙනෙත,

සෑබෑවට එය

මලක් වෙස්

ගත්තේ වෙද,

පෙනෙන තරමට

මුදු මොලොක්

නොවනු 

ඇත ! 

~S®️

2026-01-15

 

සූර්යා හිමි

තරින්දාට ය

තරින්දා හිමි

තාරුකාවට ය

ආදරය යනු

අහිමි වීම ය;

අහිමි වන බව දැන

අත්හැරීම ය

නුඹ යනු,

අත්හැරීමට

කියන

තවත්

නමක් ය !

~S®️

2026-01-08

 ඇහි දාර

තෙමාන

කොපුලත් 

කපාන 

ගලා යන

දුක් රසැති

ද්‍රාවණ 

අන්ධකාරය

පමණක්

දුටු දෙන් !

ඒ හැරුණු විට

දුප්පත් 

හිත

පමණක්

දැන උන් දෙන් !

~S®️

2025-12-22

මොකෙක්ගෙ හරි

දුකක් දැක්කම 

පපුව කියන 

මේ මලඉලව්ව 

උණුවෙනව නෙ බං 

රෙද්ද " 

පස්සෙ උන්ට 

මුල" අමතක වෙලා

අග ලොකු වෙනකොට 

උණුවෙච්ච එක

අපරාදෙ ;

මම මගෙන් ම 

අහනවා

" උඹට දැන් 

සැප ද ? " 

~S°®️

2025-12-20

 මේ තියෙන ප්‍රශ්න ගැන හිතලා ම

මට හරි මහන්සියි ඇත්තට 

මේ ඇහුන ද

පොඩ්ඩක් වත් සැනසිල්ලේ ඉන්න 

උඹ මට 

ඉඩක් දෙන්නෙම නැද්ද 

කියාපං හිත !

~S®️

2025-12-18